O delegado da Xunta presentou e moderou o acto e nas súas palabras recordou as que Vargas Llosa dedicou ao libro: "Unha historia sintética de Filipinas a través das primeiras planas dos xornais, as noticias que marcaron a súa experiencia colonial e os albores da súa independencia". Cualificouno tamén de "rigorosa investigación", un libro "instrutivo, entretido e cheo de sorpresas".

A obra recolle 150 anos de historia de Filipinas, a través da prensa, un reflexo de como os xornalistas e escritores informaron de asuntos e eventos significativos dende que se imprimiu o primeiro xornal nas illas. Un testemuño visual, en definitiva, para comprender a transformación dun pobo e unha nación, do seu paso de colonia a nación independente e da ditadura á restauración da democracia.

Ao acto asistiron, entre outros, o presidente do Consello de Estado, José Manuel Romay Beccaría, académicos da Real Academia como o profesor José Manuel Blecua, o diplomático Luis Arias e o director xeral de Migracións, Aurelio Miras Portugal.